شروط يجب توافرها في الرئيس الجديد لمصر

المرشح للرئاسة يجب أن يستمع لأغنية "دامت لمين".. ويكون عنده فيس بوك وتويتر وبيتفرج على الجزيرة.. ولا يبدأ كلامه بـ"الأخوة والأخوات"

يجب على الرئيس القادن ألا يستخدم مصطلحات "لامساس"..و"الأخوة والأخوات"
تأثرا بالاعلان الدستوري الذي أعلنه المجلس الأعلى للقوات المسلحة والذي يحدد الشروط الدستورية التي يجب أن تنطبق على مرشحي الرئاسة في الإنتخابات القادمة، انطلق نشطاء موقع تويتر هم الآخرون في إعلان شروطهم التي يريدون أن تتوفر في الرئيس الجديد المنتظر.

وتعكس الشروط المقترحة كم كبير من الأمنيات التي يريدها المصريون في رئيسهم الجديد، فهم يطمحون في رئيس من صنع رغباتهم وأمانيهم، خاصة وأن معظم الذين شاركوا في وضع تلك الشروط هم من أبناء العصر المباركي المخلوع، وهو ما يبرر وجود الكثير الشروط التي تريد ابعاد أي كلمة أو وصف أو تعليق أو حركة أو ايماءه كان يصدرها الرئيس المخلوع!

فجاء في الشروط "الشعبية" ألا يكون الرئيس الجديد منوفيا، وألا يستخدم مصطلحات مثل "محدودي الدخل"، "المرحلة المقبلة"، "لا مساس"، وغيرها من العبارات والجمل التي كان تتردد على مسامع الشعب المصري كل أول مايو!

وفيما يلي بعض من الشروط التي اقترحها شباب موقع تويتر الاجتماعي حول الرئيس المصري الجديد:
ــ لا يكون من المنوفية او يعرف اى حد من المنوفية
ــ لا يكون حريصا كل الحرص
ــ نفسيته مابتحزش من ما يلاقيه من أبناء وطنه
ــ ثبت طبيا انه لن ينجب بنات
ــ يبقى بيغير على مراته جدا وميوريناش وشها السمح
ــ زملكاوي
ــ عنده حساسية من ميدان مصطفى محمود
ــ مايروحشي شرم الشيخ
ــ صور مراته ماتنزلشي ع الكتب
ــ ما يبدأش خطبه بأيها الأخوة المواطنون
ــ ما يكونشي عنده أي ضربة لا أولى ولا ثانية ولا ثالثة
ــ مايكونشي ابنه مفجر ثورة التحديث والشباب
ــ لا يكون قام بثورة ولا حارب ولا طلع في ضربة جوية
ــ لو عبارة غرقت يقلع وينط يجيب الناس م الميه
وبدا واضحا ان هناك رغبة أكيده في إلا يكون متعاليا على الناس او منتميا لطبقة أخرى
ــ يكون فودافون ومشترك في حكاوي فرندز .. ورقمي من ضمن التلات أرقام
ــ يكون متعلم في مدارس حكومية عشان يعرف اد ايه الشعب أصيب بالغباء
ــ بيشرب شاي العروسة
ــ بيتعالج في التأمين الصحي وبيقف في الطابور كمان
ــ يكون عنده أكونت على تويتر عشان أما اتخنق منه اعمله بلوك
ــ مراته تكون حوله، أيوه حوله عشان نعرف نعايره، ما احنا شعب منفسن
ــ يقعد على القهوة ويخسر ويحاسب على المشاريب
وبدا واضحا بين إصرار المدونون ان تكون شرعيته نابعه من الثورة و ليس من دوره الوطني..
ــ مش فى كل خطاب يطلع فيه يقول انا عملت وعملت..!! لازم يحيى الثورة كل يوم الصبح لحد ما فترته تنتهى
ــ و ما يخليش أي مسئول يبداء كلامة ب بناء علي توجيهات السيد الرئيس
ــ مايكونشي ماسوني ولا لابس حظاظة
ــ اللي يصفق له وينافقه يعتقله
ميقعدشي في القصر الجمهوري ياخد شقة إيجار جديد
ــ لازم يكون مطلق اللحية وحافف الشارب وبيصلي الـ 5 صلوات في الجامع غير صلاة السنة عشان نتأكد انه مسلم
ــ عايزه يربى دقنه وينزل يصلى فى الجامع و الامن الوطنى يقفشه
ــ عايزين رئيس شيخ مش رئيس شرم
ــ كل الشعب يبقى عنده الملف بتاعه هو ومرتضى منصور
ــ لازم يقول لنا مين اللي كان واقف ورا عمر سليمان
وأصر المدونون على تويتر على إيجاد ضمانات كي يترك السلطة و حددوا مجموعة من الضمانات الساخرة مثل..
ــ ميغيرشي كل حاجة ف البلد على اسمه
ــ مايقعدشي علي كرسي الحكم يفضل واقف جنبه احنا لسه هانشيل ونخلع
ــ نمضيه على كمبيالات ونخليها معانا لحد ما يسيب الحكم
ــ يكون بيكره صفوت الشريف مش زي التلاتة اللي فاتوا
ــ مايكونشي عمره ساق طياره وميكونشي اسمه شفيق
ــ مايكونشي بيلبس بلوفر ولا بدلة متخيطة باسمه

كل يوم الصبح يسمع أغنية دامت لمين.

ما يعملش زيارات مفاجئة للمصانع يوم السبت الساعة حداشر، احنا اللي حنعمل له زيارات مفاجئة كل تلات ساعات.

مايفتكرش انه عشان بقى رئيس انه قائد الثورة

مايقولناش الإخوة و الأخوات.. أمي ما خلفتش غيري انا واخواتي

الي يقول كلمة بناء علي تعليمات السيد الرئيس يعدمة مباشرة من غير محاكمة

يكون بيتكلم و يفهم إنجليزى من غير ما يطرطق ودانه

ولو نجح بنسبة اكتر من 60% في الانتخابات يتحاكم

يبقى عارف اننا منتخبينه هوه مش هوه ومراته و ابنه و اخواته و امه و عيلته كلها

يبقى عنده فيسبوك و تويتر بس معندوش فارم فيل ..ويكتب تويت واحده ف اليوم عشان ميضيعش وقت الشعب

ميكونش ف لمعان و بريق حمادة هلال

يكون متواضع جدا ...اه طبعا .....لا مش لدرجة يقعد في خيمه دي تبقي فال شؤم

مراته لازم تاخد لقب سيدة مصر الأخيرة

مايقعدش فى القصر الجمهورى ياخد شقة ايجار جديد احسن

لازم كل جمعة بعد الصلاة يزور منطقة ويتكلم مع اهلها

ياكل العيش أبو شلن ويشرب من الحنفية

ماتكونش البدله بتاعتو مكتوب عليها اسمه.. عايزينه يجيب بدل من عند ابو نسمه

المفروض يقعد يفر كل حاجة في البلد ، يا راجل كبر مخك.

لازم يبقي عنده ريسيفر وتيلفزيون وبيتفرج علي قناة الجزيرة

بيقول الكيان دوله الإحتلال مش دوله إسرائيل

مايكونش عمل أي ضربات جوية أو أرضية أو فضائية يذلنا بيها

مش كل ما نكلمه يقولنا عيب انا زي ابوكم

ميعطلش المرور عشان يروح مشوار يمشي في الشارع زيه زينا ياما يستخدم الطياره

الخوف من وجهه نظرى هو نتجيه لخوف الناس من نهايه كل شىء بيعكس اردتهم فيخافو حتى من بدء البدايه

لا يبدأ اي جملة بكلمة "سنظل"

ما يقولش على منتخبنا كويس ومايتصلش بحسن شحاته ولا يزور اللاعبين في التمرين.

لازم مايكونش راعى الرياضة والرياضيين ولا راعى الثقافة والمثقفين ولا راعى الفن والفنانين.

ميضحكش علينا ويروح يفتتح نفس الحاجه عشرين مرة.

ميكونش بيصلي العيد قبل العيد ما يبدأ و تلاقي صورته ملطوعه عالاهرام يوم الوقفه الساعه اتناشر بليل.

يبطل كلمة نشجب و ندين.

مايكونش من محبي الاستقرار.